Dit artikel is gesjreve (of begós) in 't Norbiks. Laes hie wie v'r mit de versjillende saorte Limburgs ómgaon.
Alden Biesen is d'r naam van 'n laandscommanderiej in Rijkhove ('n deelgemèngde van Bilze) in e 56 ha groeët domein. 't Is 't groeëtste kasjtieëlcomplex tösje de Loire en d'r Rien.
De laandscommanderiej Alden Biesen mèt an 't hoofd 'ne laandscommandeur, waor d'r hoofdzetel van 'n balije of provincie van de Duutsje Orde in 't laand van Maas en Rien tiedens 't Ancien Régime. Dès balije tèlde 12 commanderieje, die sjtadsresidenties, kasjtieële en pachhäöf mèt oetgesjtrekte landerieje bezote. Eder commanderiej waoërt beheerd dör 'ne commandeur, oonder 't gezag van d'r laandscommandeur. De 12 versjillende commanderieje loge versjprèjd över 't Belsj Limburg, Nederlands Limburg, provincie Luuk, Vlamsj-Brabant, 't Nederlandse Noord-Brabant en d'r Duutsje deelsjtaot Noordrien-Wesfale van allewiel. D'r laandscommandeur èges sjtóng oonder 't gezag van d'r groeëtmeester van de Duutsje Orde.
De 12 onderhorige commanderieje van Alden Biesen waore : Klèng Bieze te Gelaen in 1468 òvergegange in Nuuj Bieze te Mestreech, Gemert in Noord-Brabant, Siersdorf in ´t Rienlaand, Bernissem oonder S'n Truje, Jungen Biesen Kölle, Bekkevoort bie Diest, Commanderiej van Gruitrode in de Limburgse Kempe, Commanderiej van S'n Pieëter, St.-Aegidius bie Aoke, kasjtieël van Ordingen oonder S'n Truje, Ramersdorf bie Bonn en St.-André in de sjtad Luuk.
't Kasjtieëlcomplex Alden Biesen is oondertösje oetgeboewd töt e cultuurcentrum van de Vlamsje Överigheed. 't Deet dèns es congrescentrum en is daobie 'n cultuurhistorische trèkplaoster.